Маладафронтаўцы Іван Шыла, Хрысьціна Самойлава, Аляксей Валабуеў, Зьміцер Банько, Анатоль Мірашнічэнка, Рыгор Астапеня, Андрусь Тычына, прадпрымальнік Уладзімер Шыла і пэнсіянер Генадзь Кудзелька былі жорстка затрыманыя падчас сацыяльнага мітынгу, арганізаванага салігорскім Маладым Фронтам.
На мітынг у абарону сацыяльных правоў, што праходзіў на Цэнтральнай плошчы гораду, сабралося каля 300 чалавек, у асноўным, моладзь ды пэнсіянеры. Як толькі Уладзімер Шыла зьвярнуўся да людзей з прамоваю, плошча была адразу ачэплена мясцовай міліцыяй ды менскім спэцназам.
У выніку было затрымана 9 чалавек. Пасьля складаньня пратаколаў па артыкуле 23.34.3 — «парушэньне правядзеньня масавага мерапрыемства, неаднаразова зьдзейсьненае на працягу года», актывістаў, акрамя Зьмітра Банько і Уладзімера Шылы, адпусьцілі. Пэнсіянеру Генадзю Кудзельку ў РАЎСе стала кепска (сэрца), ён быў адвезены ў гарадзкі шпіталь.
«На дадзены момант невядома, што будзе са Зьмітром Банько і Уладзімерам Шылам, — кажа маладафронтавец Павал Батуеў. — Хутчэй за ўсё іх будуць афармляць у ізалятар, суд, пэўна, адбудзецца заўтра. Дакладнай інфармацыі нам не даюць, адно толькі, дазволілі аддаць перадачы».
Павал Батуеў выступаў заяўніком мітынгу: «Пасьля сканчэньня акцыі мяне запрасілі на размову да начальніка міліцыі, які спэцыяльна прыехаў зь Менску на мітынг, і паведамілі, што нашым дзеяньням будзе дадзена прававая адзнака. Наўрад ці супраць мяне будзе штосьці прымацца зараз, але ня выключана, што сёньняшняя падзея будзе выкарыстоўвацца як падстава для арышту напярэдадні Дня Волі».
Прэс-служба МФ
Русский
English