Пастаянныя прадстаўнікі 27 краін Еўрасаюза на пасяджэнні 7 студзеня ў Бруселі запусцілі механізм падрыхтоўкі рашэння аб прымяненні гэтай рэгіянальнай арганізацыяй санкцый у дачыненні да ўладаў Беларусі, паведаміла РІА Новости крыніца ў Радзе ЕС.
«Яны далі сігнал пачаць унутраную працу па гэтым пытанні», — сказала суразмоўца агенцтва БелаПАН.
Пра тое, што Еўрасаюз можа аднавіць дзеянне забароны на ўезд у краіны супольнасці для прэзідэнта Беларусі Аляксандра Лукашэнкі і групы беларускіх чыноўнікаў, якія, на думку ЕС, нясуць адказнасць за насільныя дзеянні і арышты ў дачыненні да актывістаў беларускай апазіцыі, раней заяўлялі кіраўнікі МЗС Швецыі і Венгрыі Карл Більт і Янаш Мартані.
Паводле слоў суразмоўцы агенцтва, палітычнае рашэнне адносна прымянення санкцый будзе прынятае падчас першай планавай сустрэчы кіраўнікоў МЗС краін ЕС у новым годзе, прызначанай на 31 студзеня. Паводле звестак з дыпламатычных крыніцаў, спіс беларускіх афіцыйных асоб, у дачыненні да якіх ЕС мае намер прымяніць санкцыі, можа быць пашыраны да больш чым ста чалавек.
Разам з тым, крыніца РІА Новости зазначыла, што сярод дэлегацый краін ЕС ёсць розныя пукты гледжання. У прыватнасці, некаторыя краіны ЕС выступаюць за «ўзважаны падыход» у адносінах да Беларусі, каб не разбурыць тыя пазітыўныя напрацоўкі, якія былі дасягнутыя раней у палітыцы збліжэння Беларусі з ЕС.
Нагадаем, міністр замежных спраў Літвы Аўдронюс Ажубаліс на сустрэчы з прадстаўнікамі беларускай апазіцыі ў Вільнюсе 6 студзеня заявіў, што рашэнне аб далейшых адносінах з Беларуссю Еўрасаюз прыме з улікам «няправільных дзеянняў» беларускіх уладаў.
«Па сутнасці няправільныя дзеянні беларускіх уладаў працягваюцца, і Еўрасаюз павінен будзе ўлічыць гэта ў канцы студзеня, прымаючы рашэнне аб далейшых адносінах з Беларуссю, — цытуе Ажубаліса сайт МЗС Літвы. — Мы не зможам спакойна махнуць рукой на тое, што адбылося ў Беларусі 19 снежня і што адбываецца дагэтуль: не адпушчаны затрыманыя, працягваюцца вобыскі, арышты, праводзяцца акцыі запалохвання грамадзянскай супольнасці».
У МЗС Беларусі заяўляюць, што «частка нашых еўрапейскіх партнёраў мае скажоныя ўяўленні аб рэальнай палітычнай і сацыяльнай сітуацыі ў Беларусі». Як сказаў 4 студзеня прэс-сакратар МЗС Беларусі Андрэй Савіных, гэта падштурхоўвае іх да прыняцця рашэнняў, якія «будуць наносіць урон нармальнаму ўзаемадзеянню і тым каштоўнасцям, прыхільнасць да якіх яны самі дэкларуюць».
У кастрычніку 2010 года Рада ЕС падоўжыла да 31 кастрычніка 2011 года забарону на ўезд у ЕС прэзідэнта Лукашэнкі і яшчэ 35 афіцыйных асоб, адначасова пакінуўшы ў сіле рэжым непрымянення візавых абмежаванняў у дачыненні да іх.
Пасля прэзідэнцкіх выбараў у 2006 годзе ЕС увёў у адносінах да Беларусі эканамічныя санкцыі, а таксама візавыя абмежаванні для беларускіх чыноўнікаў, у тым ліку для Лукашэнкі, абвінаваціўшы прэзідэнта Беларусі ў правядзенні несвабодных выбараў.
Русский
English