«Мая галоўная мэта — пры маiм жыцьцi даведацца, хто выканаў загад забiць майго мужа, бо iмя заказчыка мне вядома», — паведаміла 13 жнiўня на сустрэчы з прадстаўнікамі грамадзкасьці Гародні Людмiла Карпенка, жонка вядомага беларускага палiтыка Генадзя Карпенкi, які памёр пры нявысьветленых абставінах. Людмiла Карпенка назвала сьмерць свайго мужа «палiтычным забойствам».

Сустрэча з Людмiлай Карпенка i Iрынай Красоўскай, жонкай бiзнэсоўца Анатоля Красоўскага, які зьнік бяз зьвестак, адбылася ў Гародні ў памяшканьнi грамадзкага аб`яднаньня «Ратуша». Падчас сустрэчы жанчыны распавялі пра абставiны сьмерцi Генадзя Карпенкi, зьнiкненьня Юры Захаранкi, Вiктара Ганчара, Анатоля Красоўскага, Зьміцера Завадзкага.

Iрына Красоўская абвергла меркаваньне, якое прагучала падчас сустрэчы ў Гародні, што да зьнiкненьня вядомых палiтыкаў нібыта мае дачыненьне беларуская апазыцыя. Паводле словаў Iрыны Красоўскай, «беларуская апазыцыя не магла ажыцьцявіць такiя злачынствы».

Iрына Красоўская ня лiчыць свайго мужа загiнуўшым. Яна адзначыла: «У мяне няма падставаў лiчыць, што ён забiты. Пакуль я жыву, я буду спадзявацца, што ён таксама жывы». Прысутных на сустрэчы грамадзянаў цiкавiлi перспэктывы расьследаваньня «гучных» крымінальных справаў у Беларусі. Людмiла Карпенка паведамiла, што яна вядзе самастойнае следзтва, аднак на ейную думку, пры сёньняшняй уладзе людзi, якiя шмат маглi б распавесьці, баяцца казаць.

Хартия-97