Сёньня ў Менску супрацоўнікі АМАПу разагналі акцыю «Ланцуг неабыякавых людзей», прымеркаваную да пятай гадавіны зьнікненьня тэлеапэратара ОРТ Зьмітра Завадзскага. Пад час разгону адзін з супрацоўнікаў АМАПу ўдарыў у твар жонку Завадзкага — Сьвятлану.

Каля 30 ўдзельнікаў «Ланцугу неабыякавых людзей» прастаялі з партрэтамі Зьмітра Завадзскага і Веранікі Чаркасавай на Кастрычніцкім пляцы толькі некалькі хвілінаў. Некалькі дзесяткаў амонаўцаў адразу пачалі выціскаць людзей з пляцу.

(Спадарыня: ) «Куды вы нас гоніце, хлопцы?»

(Спадарыня: ) «Не чапайце мяне.»

(Спадар: ) «Гэта сапраўдны бандытызм».

Калі адбываўся разгон акцыі, на ўвесь пляц гучалі навіны тэлеканала ОНТ.

Адзін з амапаўцаў ударыў у твар Сьвятлану Завадзкую і зьмяў партрэт яе мужа Зьмітра Завадзскага.

(Завадзкая: ) «Фашысты! Вы толькі ўмееце забіваць людзей, а не абараняць… Я не магу стаяць з партрэтам свайго мужа. У мяне няма нават такой магчымасьці ў гэтай краіне.»

Гаворыць прадстаўнік Беларускай асацыяцыі журналістаў Уладзімер Дзюба.

(Дзюба: ) «Гэта дзікунства, тое, што адбылося. Адзін з амапаўцаў ударыў у твар жонку Дзімы Завадзкага. Гэта вельмі брыдка і нізка. Так не павінны рабіць людзі, якія мусяць абараняць грамадзкі спакой і грамадзянскія правы. Усё наадварот, атрымоўваецца».

Супрацоўнікі АМАПу прымусілі ўдзельнікаў акцыі дайсьці да Траецкага прадмесьця. У той жа час каля дзесяці чалавек заставаліся стаяць на Кастрычніцкай плошчы. Сярод іх Анатоль Лябедзька.

(Лябедзька: ) «Што адбывалася… Спрабавалі ўсіх накіраваць адтуль. Я ня ведаю, чаму гэтае месца? Відаць, Аляксандру Рыгоравічу не падабаецца, калі на Кастрычніцкім пляцы ёсьць іншая думка і людзі, якія ня хочуць глядзець вачыма Аляксандра Рыгоравіча. Тое, што адбываецца, гэта палітычная шызафрэнія».

Сярод тых, хто браў удзел у «Ланцугу неабыякавых людзей», прымеркаваным да пятай гадавіны зьнікненьня Зьмітра Завадзскага — ягоныя калегі-журналісты, сябры Аб’яднанай грамадзянскай партыі, партыі БНФ, Кансэрватыўна-хрысьціянскай партыі БНФ, Андрэй Клімаў, Валер Шчукін ды іншыя апазыцыйныя актывісты.

Ганна Соусь, Менск
svaboda.org