Гэты тыдзень у Польшчы можна назваць беларускім. Тыдзень Беларусі ў Познані, сэрыя канцэртаў беларускіх выканаўцаў у Варшаве і Гданьску, а цяпер — пачатак дзён беларускай культуры ў Кракаве. Адметна, што ўсе гэтыя падзе адбываюцца без запрашэньня афіцыйных беларускіх прадстаўнікоў. Пра беларускія імпрэзы ў старажытнай польскай сталіцы расказвае наш варшаўскі карэспандэнт.

Дні беларускай культуры ў Кракаве ладзяцца ўжо трэці раз запар і нязьменна выклікаюць вялікую зацікаўленасьць жыхароў гэтага старажытнага гораду.

Томаш Пугацэвіч, адзін з арганізатараў дзён беларускай культуры, сказаў:

(Пугацэвіч: ) «Адкрыцьцё дзён беларускай культуры адбылося ў галоўным будынку Ягелёнскага ўнівэрсытэту — было сапраўды шмат людзей. Гэтая тэма ўжо даўно і даволі моцна цікавіць жыхароў Кракава».

Сёлета жыхары Кракава маюць магчымасьць пазнаёміцца, сярод іншага, зь цяперашняй сытуацыяй беларускай мовы ў сыстэме адукацыі Беларусі, узяць удзел у дыскусіях што ад ролі моладзі ў адраджэньні нацыянальнай сьвядомасьці беларусаў, патанчыць на беларускай дыскатэцы ці паслухаць выступы беларускіх музыкаў, сярод якіх гурт «BN».

Трэція дні беларускай культуры ў Кракаве маюць пэўныя адрозьненьні ад таго, што адбывалася год таму. Мартына Квяткоўска, адна з арганізатарак дзён культуры:

(Квяткоўска: ) «Гэтым разам мы больш увага надаём сучаснай беларускай літаратуры. Лічым, што гэта вельмі важна, каб палякі пазнаёміліся з творамі асабліва маладых беларускіх літаратараў. Хочам таксама шырэй пагаварыць пра сытуацыю, у якой апынуліся недзяржаўныя арганізацыі ў Беларусі. Мы запрасілі шэраг прадстаўнікоў беларускага трэцяга сэктару, але, ведаючы апошнія выпадкі, калі беларускія ўлады не выпускаюць з краіны сваіх грамадзянаў, хвалюемся каб ў іх не было праблемаў на мяжы».

Адметна, што дні беларускай культуры, аўтарам ідэі якіх быў беларус-выкладчык Ягелёнскага ўнівэрсытэту Генадзь Семянчук, арганізуюць перадусім студэнты ўнівэрсытэту.

Прадстаўнікоў беларускіх уладаў на іх не запрашаюць.

(Квяткоўска: ) «Я не накіроўвала ім запрашэньняў — ня ведаю, нават, як бы прысутнасьць гэтых людзей тут выглядала, ці было б гэта дарэчы і ці мела б нейкі сэнс».

Аляксей Дзікавіцкі
Радыё Свабода