24 красавiка на Кастрычніцкім пляцы быў пастаўлены жоўта-блакітны намёт з чырвоным надпісам «Нас не спыніць». Намёт прастаяў дзьве хвіліны — людзі ў цывільным скінулі яго ў падземны пераход, зламалі і вынесьлі ў мэтро. За мужчынам, які нібыта меў дачыненьне да намёту, пагналіся міліцыянты...

На Кастрычніцкім пляцы пасьля 19-ай гадзіны быў заўважаны кіраўнік палка міліцыі спэцыяльнага прызначэньня Юры Падабед. На падыходах і па пэрымэтры разьмеркаваліся пераапранутыя ў цывільнае супрацоўнікі міліцыі. А 8-й вечара яны правялі першае затрыманьне. Міліцыянты пазналі былога абаронцу намётавага гарадка Ільлю Шыманскага, які накіроўваўся на плошчу разам са сваімі сябрамі.

(Дзяўчына: ) «Падабед ходзіць за намі літаральна па пятах. Залезьлі ў пакет, пабачылі лістоўкі — «Пройдзем!»

(Юнак: ) «Калі я падышоў, то ўжо два спэцназаўцы ў камуфляжнай форме трэсьлі яго. Хацеў забраць сумку, але было позна. Ільля вось толькі 22-га красавіка выйшаў. Ён сядзеў 10 сутак, як толькі ўзялі намётавы гарадок, пасьля 7-га красавіка яго зноў тут узялі».

(Другі юнак: ) «Яго прывялі вось сюды, да аркі, якая насупраць Палацу рэспублікі. Пад’ехаў мікрааўтобус, і яго ўпіхнулі туды».

На момант прадрыхтоўкі матэрыялу дзяжурны Цэнтральнага райаддзелу міліцыі Менску пацьвердзіў, што Ільля Шыманскі знаходзіцца пад вартай.

Радыё Свабода