16 жніўня ў Берасці прайшла чарговая акцыя салідарнасці з сем’ямі зніклых і зняволеных беларускіх палітыкаў.

Пачалася яна а 9-й гадзіне вечара ля прыпынку МОПРа. У акцыі ўдзельнічала каля 40 актывістаў кампаніі «За свабоду», якія запалілі свечкі і, трымаючы іх у руках, выцягнуліся ў ланцужок уздоўж праспекта Машэрава.

З самага пачатку мерапрыемства ў гэтым месцы прысутнічала вялікая колькасць супрацоўнікаў міліцыі як у форме, так і ў цывільным. Заўважыўшы, што ўдзельнікі акцыі пачынаюць запальваць свечкі, міліцыянты адразу ж пачалі «прымаць меры». З мэтаю не дапусціць працягу мерапрыемства супрацоўнікі праваахоўных органаў выкарыстоўвалі розныя метады: ад «ветлівых» просьбаў пагасіць свечкі з-за небяспекі загарання газонаў да пагрозаў завесці ва ўчастак для высвятлення асобаў. Асабліва «вызначыліся» супрацоўнікі ў цывільным, якія вырывалі свечкі, б’ючы па руках ўдзельнікаў акцыі. На заўвагі прысутных і просьбы высветліць асобы гэтых невядомых людзей, супрацоўнікі міліцыі адварочвалі твары і рабілі выгляд, быццам нічога не бачаць. Тыя ж, у сваю чаргу, цвердзілі, што яны звычайныя мінакі і ніякіх свечак не чапалі.

Пабачыўшы, што далей у гэтым месцы працягваць акцыю не падаецца мажлівым, яе ўдзельнікі з запаленымі свечкамі пачалі рушыць у бок бульвара Касманаўтаў. Але супрацоўнікі міліцыі і тыя «звычайныя мінакі» вырашылі суправаджаць маладых людзей са свечкамі, пры гэтым патрабуючы ў іх пашпарты і перапісваючы прозвішчы ўдзельнікаў. Два актывісты былі затрыманыя дзеля высвятлення асобаў. Пасля 20-хвіліннага ўтрымання ў апорным пункце, яны былі выпушчаныя.

За хадою акцыі крыху воддаль пільна сачылі невядомыя людзі ў цывільным, здымаючы ўсё на відэакамеру. Толькі пасля таго, як усе ўдзельнікі акцыі разышліся, яны спынілі сваё назіранне.

Акцыя скончылася ў 22-00, але яе ўдзельнікі цвердзяць, што яна будзе працягвацца як і раней — 16-га чысла кожнага месяца да тых часоў, пакуль з беларускіх турмаў не выйдзе апошні палітвязень, а лёсы зніклых палітыкаў і журналістаў не стануць вядомыя грамадскасці.

www.dzedzich.org