Некалькі сотняў чалавек прыйшло ўчора на заклікі Маладога Фронту й лідэра аб'яднаных дэмакратычных сілаў Аляксандра Мілінкевіча на плошчу Кастуся Каліноўскага, каб выказаць Салідарнасьць з палітвязьнямі й зьніклымі палітыкамі Беларусі.

Як толькі ўздоўж плошчы ўтварыўся ланцуг Салідарнасьці, ланцуг неабыякавасьці да тых жудасных падзеяў, што адбываюцца на нашае з Вамі зямлі, некалькі дзесяткаў прысутных супрацоўнікаў КДБ, АМАПУ й міліцыі пачалі адціскаць людзей да Палацу Рэспублікі, дзе ўжо былі падрыхтаваныя аўтобусы. Такім чынам акцыя была разагнаная пасьля некалькіх хвілінаў таго, як пачалася. Сьвечкі Салідарнасьці і партрэты зьніклых ізноў сталі сур'ёзнаю пагрозаю, дзя існаваньня дыктатарскага рэжыму. Знайсьці прычыны й сэнс у дзеяньнях тых, хто аддаваў учора, як і раней загады на тое, каб разагнаць людзей, якія мірна нагадвалі беларусам аб тым, што ў Беларусі зьнікаюць людзі, немагчыма. Партрэты й сьвечы — гэта частка праўды, якая зьяўляецца галоўным ворагам беларускае ўлады.

Прэс-служба МФ