Сёньня ў 16 гадзінаў намеснік старшыні суду Кастрычніцкага раёна Ала Булаш абвясьціла прысуд па справе лідэра «Маладога Фронту» Зьміцера Дашкевіча — 1,5 гадоў пазбаўленьня волі ў калоніі агульнага рэжыму. Ён абвінавачаны ў парушэньні арт.193 — «дзейнасьць ад імя незарэгістраванай арганізацыі».

рацэс па справе адбываўся ў закрытым рэжыме, на абвяшчэньне прысуду, які заняў некалькі хвілінаў, у судовую залу дазволілі прайсьці бацьку Зьміцера, амбасадарам краінаў Еўразьвязу і ЗША, а таксама некаторым журналістам.

Падтрымаць лідэра «МФ» да будынку суда прыйшла вялікая колькасьць моладзі, якая трымалі партрэты Зьміцера Дашкевіча, скандавала «Свабоду Дашкевічу!», «Ганьба!». Усклаўшы на ганак суду бел-чырвона-белыя кветкі, маладыя людзі ў знак салідарнасьці сталі на калені, дэманструючы — «Сядзім разам з Дашкевічам!». Байцы сьпецпадразьдзяленьняў і супрацоўнікі міліцыі назіралі за акцыяй, але нікога не чапалі.

Адвакат Зьміцера Дашкевіча паведаміў, што ў вызначаны тэрмін прысуд будзе абскарджаны ў вышэйстаячай інстанцыі. Пасьля абвяшчэньня прысуду на заўтра бацьку дазволілі сустрэчу са Зьміцерам .

Праваабаронца Алесь Бяляцкі пракаментаваў: «Я лічу, што гэта неабгрунтавана жорсткі прысуд, і закрытасьць самога працэсу сьведчыць пра тое, што ўладам, як і ў выпадку з «Партнёрствам», не было чаго паказваць, не было падставаў, якія цягнулі б на такі тэрмін. Разам з тым радуе тое, што пазіцыя міжнароднай супольнасьці і беларускай моладзі, якія прыйшлі падтрымаць лідэра «Маладога Фронту» супадаюць, гэта вельмі істотна».

ПЦ Вясна-96