У Варшаве, каля будынку амбасады Беларусі, адбыўся пікет з нагоды Дня салідарнасьці зь беларускімі палітвязьнямі і сем’ямі зьніклых. Каля 15 чалавек трымалі ў руках бел-чырвона-белыя сьцягі, партрэты зьніклых палітыкаў і плякаты з надпісамі «Дыктатара ў турму», «Свабоду палітвязьням».

У пікеце ўзяў удзел вядомы беларусі мастак Алесь Пушкін, які зьвярнуўся да прыстуных з кароткай прамовай.

«Усе мы — беларусы, якія жывуць у Беларусі і тут у Польшчы, павінны памятаць, што нельга будаваць што — заўгодна, ісьці да нейкай мэты праз забойствы, праз перасьлед тых, хто думае іначай. Трэба правесьці сьледзтва, знайсьці і пакараць вінаватых у гэтых злачынствах, кім бы яны ні былі. Потым пакаяцца і сказаць — такое больш не паўторыцца ніколі!», — сказаў мастак.

Каля агароджы амбасады ўдзельнікі пікету запалілі белыя і чырвоныя зьнічы.

Аляксей Дзікавіцкі
Радыё Свабода