Ці назавуць менскую вуліцу імем Юрыя Захаранкі?

З такой ініцыятывай зьвярнуліся актывісты арганізацыі «Маладыя дэмакраты» да кіраўніка менскага гарвыканкаму Міхаіла Паўлава.

«Гэта можа быць вуліца Жукоўскага, на якой Юрый Захаранка жыў і дзе яго скралі, ці нейкая іншая вуліца. Галоўнае — ушанаваць памяць вядомага палітыка і дзяржаўнага дзеяча, былога міністра ўнутраных спраў Юрыя Захаранкі», — патлумачыў Радыё Свабода лідэр «Маладых дэмакратаў» Міхаіл Пашкевіч.

Паводле Міхаіла Пашкевіча, цяпер актывісты вывучаюць магчымасьць падобнай ініцыятывы і адносна іншых зьніклых апазыцыянэраў — Віктара Ганчара, Анатоля Красоўскага і Зьмітра Завадзкага.

Нагадаем, Юрыя Захаранку скралі ў траўні 1999 году, гэтая справа ўсё яшчэ расьсьледуецца. Віктар Ганчар і Анатоль Красоўскі былі скрадзеныя ў верасьні 1999 году, іх лёс таксама ня высьветлены. Толькі журналіста Зьмітра Завадзкага, якога скралі ў 2000 годзе, суд прызнаў нябожчыкам, але цела былога апэратара ОРТ дагэтуль ня знойдзена.

Алег Грузьдзіловіч
Радыё Свабода