Шэраг вядучых польскіх газэтаў зьмясьцілі
матэрыялы, у якіх распавядаецца пра зварот жонак зьніклых
беларускіх палітыкаў да прэзыдэнта Польшчы Аляксандра Квасьнеўскага.
Артыкулы ў гэтай справе зьявіліся, сярод іншых, у аўтарытэтных
штодзёньніках «Gazeta Wyborcza», «Zycie» «Rzeczpospolita». «Мы, жонкі беларускіх апазыцыйных дзеячаў, ведаючы спадара
Прэзыдэнта як прыхільніка дэмакратычных каштоўнасьцяў, зьвяртаемся
з просьбай аб дапамозе. Просім, у часе спатканьня з прэзыдэнтам
Пуціным, пры магчымасьці, закрануць пытаньне пра тых апанэнтаў
рэжыму, што загінулі, зьніклі ці знаходзяцца зараз у турмах,
пра ўдзел у гэтым беларускіх уладаў, а таксама пазыцыю Расеі
ў гэтай справе», — цытуе ліст Людмілы Карпенка, Вольгі Захаранкі,
Зінаіды Ганчар, Ірыны Красоўскай, Сьвятланы Завадзкай і
Тацяны Клімавай «Gazeta Wyborcza».
Побач з цытатамі са звароту штодзёньнік зьмяшчае таксама
кароткія зьвесткі пра зьніклых ды асуджаных апазыцыйных
палітыкаў. Адметна, што матэрыял у гэтай справе «Wyborcza»
зьмясьціла побач з матэрыялам пра чарговыя сутычкі ў Бэлфасьце.
»Беларуская апазыцыя просіць у Квасьнеўскага дапамогі»,
— пад гэткім загалоўкам пра зварот беларускіх жанчынаў да
Аляксандра Квасьнеўскага распавядае ў сёньняшнім нумары
штодзёнтьнік «Zycie».
Сярод іншага газэта адзначае, што летась беларуская незалежная
прэса, а таксама расейскае тэлебачаньне, распавядалі «эскадроны сьмерці», якія непасрэдна займаліся ліквідацыяй
асобаў, невыгодных Аляксандру Лукашэнка, аднак беларуская
пракуратура праігнаравала гэтыя паведамленьні.
»Zycie» падае таксама камэнтар Першага сакратара польскай
амбасады ў Менску Марка Буцько, які адзначае, што польскае
дыпляматычнае прадстаўніцтва даўно ўтрымлівае кантакты з
падпісанткамі звароту. Паводле спадара Буцько, польская
амбасада таксама шматкротна дамагалася ў беларускіх ўладаў
згоды на наведваньне праціўнікаў Лукашэнкі, якія сядзяць
цяпер у турмах.
Варта адзначыць, што ў часе леташняга візыту Аляксандра
Квасьнеўскага ў Расею, не было ніводнага паведамленьня пра
тое, што ў часе перамоваў прэзыдэнты якім-небудзь чынам
закраналі пытаньні, зьвязаныя зь Беларусьсю.
Магчыма, што гэтым разам, па шматлікіх публікацыях у сродках
масавай інфармацыі, сітуацыя зьменіцца на карысьць аўтарак
звароту.
Аляксей Дзікавіцкі
«Радыё Свабода»
|