»Учора ўсе мы запалілі свечку свабоды. Гэта быў добры час, каб ціха, без мітусні прыгадаць усіх, каго сёння няма з намі, хто змагаецца за свабоду і дэмакратыю ў Беларусі. Добры час, каб падумаць аб будучыні нашай краіны,» — заявіла жонка зніклага бізнэсоўца і грамадскага дзеяча Анатоля Красоўскага, лідэр грамадзянскай ініцыятывы «Мы помнім» Ірына Красоўская. Дзень салідарнасці з беларускімі палітвязнямі, зніклымі апазіцыянерамі, іх сем’ямі, незалежнымі журналістамі, з усімі, хто змагаецца за дэмакратыю прайшоў 16 кастрычніка ва ўсім свеце. У 20.00 у шмат якіх вокнах пагасла святло і запаліліся свечкі з верай ў свабодную дэмакратычную будучыню нашай краіны. Акцыю актыўна падтрымалі ў шмат якіх беларускіх гарадах — Горадні, Берасці, Віцебску, Гомлі, Магілёве, Баранавічах, Барысаве, Пінску, Полацку, Лідзе, Слоніме, Жодзіне, Оршы, а таксама ва ўсіх раёнах Менска. У некаторых дамах у цэнтры Менска і ў мікрараёнах Уручча, Малінаўке, Шабанах, Паўднёвым Захадзе і Сухарава пагаслі амаль усе вокны. Акцыі салідарнасці з Беларуссю прайшлі ў розных кропках планеты. Свечы свабоды былі запаленыя ў ЗША, Канадзе, Нідэрландах, Германіі, Швецыі, Польшчы, Украіне, Расіі і іншых краінах.

»Я думаю, што Дзень салідарнасці — гэта вельмі добрая нагода для кожнага чалавека, каб яшчэ раз падумаць аб тым, чаго ён хоча для сабе, для сваіх дзяцей, для сваёй краіны. Я атрымала шмат паведамленняў і тэлефанаванняў ад людзей з розных краінаў — Грузіі, Украіны, Літвы, Латвіі, Эстоніі, Швецыі, ЗША, Германіі, Бельгіі, іншых краін. Сёння зранку, калі я даведалася, што адбылося ў Беларусі, аб падтрымке гэтай акцыі розўнымі краінамі, у мяне з’явіліся адчуванні радасці і хвалявання, якія ўзнікаюць толькі тады, калі адчуваеш вялікую падтрымку, калі разумееш, што ты маеш рацыю, што шмат хто думае як ты і салідарны з табою. Я думаю, гэта толькі пачатак. Мы будзем працягваць акцыі салідарнасці. І кожная з іх дадасць нам прыхільнікаў,» — упэўненая Ірына Красоўская.

Прадстаўнікі грамадзянскай супольнасьці Беларусі прапанавалі правесьці 16 кастрычніка 2005 году Дзень салідарнасьці з беларускімі палітзьняволенымі, зьніклымі апазыцыянэрамі, іх сем’ямі, незалежнымі журналістамі, з усімі, хто змагаецца за Свабоду і Дэмакратыю ў Беларусі. Красоўская, каардынатар руху «Зубр» Мікіта Сасім і вядомая журналістка Ірына Халіп на прэсавай канфэрэнцыі ў Менску заклікалі беларусаў на знак салідарнасьці 16 кастрычніка ў 20.00 выключыць на 15 хвілінаў сьвятло ў сваёй кватэры і паставіць на падваконьне запаленую сьвечку.

Хартия-97