У Празе завяршылася генэральная асамблея Мадрыдзкага клюбу, які аб`ядноўвае 30 былых кіраўнікоў краінаў і ўрадаў. Задачы клюбу — акумуляваць досьвед вядомых палітыкаў і дзеячаў дзеля рэкамэндацыяў для тых краінаў, якія на шляху да дэмакратыі. «Я ня думаю, што ў Беларусі могуць адбыцца выбары, калі апазыцыя можа мець хоць нейкі шанец на посьпех. Бо ў Беларусі — таталітарны рэжым. Я думаю, што паколькі Расея мае ўплыў на сытуацыю ў Беларусі, Расеі павінна быць сорамна за тое, што адбывацца. Пэўная частка расейскай грамадзкасьці павінна паўплываць на зьмену сытуацыі ў Беларусі», — заявіў вядомы мэцэнат Джордж Сорас «Радыё Свабода».

Былы амэрыканскі прэзыдэнт Біл Клінтан адзначыў — «забесьпячэньне правоў розных нацыянальнасьцяў і у розных краінах — задача тых, хто можа паўплываць на дэмакратызацыю». Бірма, Беларусь, Куба — пра гэтыя краіны нельга забываць, калі гаворка аб свабодным грамадзтве — гэта фраза былога чэскага прэзыдэнта Вацлава Гавэла.

Найчасьцей на паседжаньнях Мадрыдзкага клюбу згадваліся Ўкраіна і Грузія — і тэма рэвалюцыйных пераўтварэньняў у краінах–былых рэспубліках СССР.

У канчатковых рэкамэндацыях мадрыдзкага клюбу адзначана, што Беларусь адна з прыярытэтных краінаў, дзе б былыя кіраўнікі краінаў маглі скарыстаць свой досьвед дзеля кансультацыяў зацікаўленых сілаў у зьмене сытуацыі. Праблема — ізаляцыя і нежаданьне беларускіх уладаў весьці дыялёг, а таксама слабыя магчымасьці апазыцыйных сілаў.

Радио «Свабода»