Дэлегацыя Эўрапейскага парлямэнту ў складзе
сямі чалавек мае намер прыехаць наступным тыднем у Беларусь
для назіраньня за галасаваньнем на прэзыдэнцкіх выбарах.
У інтэрвію нашаму радыё старшыня камісіі ў міжнародных справах
Эўрапарлямэнту Эльмар Брок адзначыў, што перасьлед рэжымам
Лукашэнкі беларускай апазыцыі фактычна не пакідае надзеі
на правядзеньне сумленных і свабодных выбараў прэзыдэнта.
Кіраўнік дэлегацыі Эўрапалямэнту для назіраньня за выбарамі
ў Беларусі Богдан Кліх не выключае, што дэлегацыя ня будзе
прапушчаная на беларускую тэрыторыю. Эўрапейскі парлямэнт
ня мае запрашэньня ад Нацыянальнага сходу Беларусі: эўрадэпутаты
не падтрымліваюць кантактаў зь цяперашнім беларускім парлямэнтам,
бо не прызнаюць яго за дэмакратычна абраны орган улады.
Напярэдадні чальцы дэлегацыі Эўрапарлямэнту для назіраньня
за выбарамі ў Беларусі выступілі з заяваю, у якой асудзілі
зафіксаваныя на працягу апошніх дзён парушэньні стандартаў
дэмакратычных выбараў.
Старшыня камісіі ў міжнародных справах Эўрапарлямэнту Эльмар
Брок заклікаў прэзыдэнта Расеі Ўладзіміра Пуціна выкарыстаць
свой уплыў на сытуацыю ў Беларусі для забесьпячэньня дэмакратычнага
ходу выбарчай кампаніі на яе заключным этапе. У інтэрвію
нашаму радыё Брок заявіў, што беларуская апазыцыя можа разьлічваць
на падтрымку міжнароднай дэмакратычнай супольнасьці:
(Брок: ) «Я думаю, надыходзіць момант, калі мы павінны
паказаць беларускім людзям, што зь імі салідарны дэмакратычны
сьвет. Тут, у Эўропе, мы пачуваемся адказнымі зрабіць гэта,
і я спадзяюся, сродкі масавай інфармацыі гатовыя паказаць
Лукашэнку й ягонаму абкружэньню, што беларускі рэжым ізаляваны
ў сьвеце».
Тым часам прэсавы сакратар беларускага МЗС Андрэй Папоў
заявіў сёньня, што «назіраць за выбарамі ў Беларусі могуць
толькі назіральнікі, афіцыйна запрошаныя беларускім бокам,
якія атрымалі адпаведную акрэдытацыю». «Мы чакаем тых, каго
запрасілі, і не чакаем тых, каго не запрашалі», — сказаў
прадстаўнік Міністэрства замежных справаў Беларусі. Паводле
яго словаў, чакаецца, што ўсяго на выбарах у Беларусі будуць
працаваць 434 назіральнікі ад СНД і 450 — ад Арганізацыі
бясьпекі й супрацоўніцтва ў Эўропе.
Юрась Бушлякоў
Радыё Свабода
На фото: председатель комиссии по международным
делам Европарламента Эльмар Брок
|
