Швайцарыя далучылася да санкцыяў Эўрапейскага зьвязу супраць беларускіх чыноўнікаў, адказных за парушэньні правоў чалавека і фальсыфікацыі вынікаў прэзыдэнцкіх выбараў і таксама забараніла ім уезд на сваю тэрыторыю.

Прадстаўнік Фэдэральнага дэпартамэнту замежных справаў Швайцарыі Жан-Філіп Жэнэро патлумачыў, што рашэньне швайцарскіх уладаў не пускаць на сваю тэрыторыю беларускіх чыноўнікаў, адказных за парушэньні правоў чалавека і фальсыфікацыі вынікаў выбараў, зьвязанае з «адсутнасьцю свабоды ў гэтай былой савецкай рэспубліцы».

У такой сытуацыі, Швайцарыя падтрымлівае санкцыі Эўрапейскага зьвязу, у склад якога сама не ўваходзіць.

Швайцарскія ўлады яшчэ 27 сакавіка ў адмысловай заяве заклікалі беларускія ўлады неадкладна вызваліць палітзьняволеных, спыніць парушэньні правоў чалавека і забясьпечыць сваім грамадзянам права на свабоду слова і сходаў.

«Фэдэральны дэпартамэнт замежных справаў Швайцарыі афіцыйна заклікае беларускія ўлады выконваць свае міжнародныя абавязацельствы што да падставовых правоў і свабодаў чалавека. Калі палітычная сытуацыя ў Беларусі не палепшыцца хутка і на працяглы час, Швайцарыя будзе разглядаць магчымасьць увядзеньня мэтанакіраваных санкцыяў супраць Беларусі», — гаворыцца ў заяве швайцарскх уладаў.

Аляксей Дзікавіцкі
Радыё Свабода