У Польшчы пачалася акцыя «Свабоду Мікіту Сасіму»

25.04.2006

Польскі Зьвяз на карысьць дэмакратыі ў Беларусі пачаў акцыю «Свабоду Мікіту Сасіму», якая палягае ў высылцы як мага большай колькасьці лістоў зьняволенаму актывісту руху «Зубр».

Зьвяз на карысьць дэмакратыі ў Беларусі распаўсюдзіў заяву, у якой гаворыцца, што Мікіта Сасім, які ў часе акцыі пратэсту замест адабранага ў яго міліцыянтамі бел-чырвога-белага сьцягу ўзьняў над галавой джынсавую кашулю — а джынс цяпер стаў сымбалем супраціву рэжыму Лукашэнкі — плаціць за гэта вялікую цану.

«Яго моцна зьбілі супрацоўнікі АМОНу, так што Мікіта патрапіў у шпіталь... а цяпер за апазыцыйную дзейнасьць яму пагражае да 3 гадоў турэмнага зьняволеньня — хаця фармальна абвінавачаньні іншыя. Мы ведаем, што ў гэтай цяжкай для яго сытуацыі любая падтрымка звонку дадае сілаў і можа падтрымаць дух», — адзначаецца ў заяве з заклікам пісаць лісты да Мікіты ў Баранавіцкае СІЗА.

Паводле намесьніка старшыні Зьвязу Віталя Лоцманава, такая акцыя можа быць эфэктыўнай.

(Лоцманаў: ) «Мы хочам, каб улады адчулі ўціск. Такія акцыі маюць сэнс — гэта вядома з досьведу «Салідарнасьці», калі палітвязьняў завальвалі вялізнай колькасьцю лістоў з Захаду. Часам улады альбо злагоджвалі ім умовы, альбо ўвогуле выпускалі з турмаў».

Лісты ў СІЗА, дзе знаходзіцца Мікіта Сасім — гэта не адзіная акцыя ў справе вызваленьня актывіста «Зубра». Пра іншыя акцыі прадстаўнікі Зьвязу на карысьць дэмакратыі ў Беларусі, аднак, пакуль не гавораць.

(Лоцманаў: ) «Будуць, канешне яшчэ іншыя акцыі, але пра іх казаць пакуль заўчасна — не надышоў пакуль момант на чарговы этап акцыяў у справе Мікіты».