Першая гістарычна-забаўляльная мультымэдыя-кніга пра Вясну-2006
Не прайшло і паўгады з часу Менскай вясны’2006, як на сьвет зьявілася ўнікальная мультымэдыйная кніга, прысьвечаная падзеям на Кастрычніцкай Плошчы. «Open air RAVElution» — гэта суб’ектыўны канспэкт падзей і пачуцьцяў, якімі жылі дзясяткі тысячаў маладых беларусаў 19-25 сакавіка 2006 году. Канспэкт, праілюстраваны фота-, відэа-, аўдыё і напісаны ў жанры «pop history».

«Open air RAVElution» — гэта не звычайная гістарычная мультымэдыйная кніга. Для аўтараў было ня столькі важна быць дакладнымі ў датах і назвах. Нашмат цікавей было ўзгадваць і расказваць пра важныя дэталі, ключавыя паняцьці і пэрсоны вясновай Рэйвалюцыі. Рэйвалюцыі зь вялікай літары: гаворка ў кнізе вядзецца пра той пераварот, які з 19 па 25 сакавіка 2006 г. адбыўся ў мазгах беларусаў, перадусім, маладых. Для якіх апошнія пяць год былі поўным даўнам і ступарам грамадзкага жыцьця.

Адкуль такая назва? Мы амаль не перабольшваем, кажучы: з 19 па 25 сакавіка 2006 г. у Менску прайшоў першы open air RAVEvolution — экстрэмальна-забаўляльнае party 24 гадзіны ў суткі. Мерапрыемства з маштабнай PR-кампаніяй, непрадуманай праграмаю, кепска разьвітай інфраструктураю, але з выдатнай самаарганізацыяй.

Сакавіцкі Open Air нават меў сваё «сэкьюрыці», у ролі якога выступалі «супрацоўнікі праваахоўных органаў». Праўда, вельмі хутка высьветлілася, што security — гэта звычайныя гопнікі. Гопнікі, нашэсьця якіх баіцца любы арганізатар вялікіх мерапрыемстваў. Таму Рэйвалюшн стаў ня проста шматдзённым пратэстам супраць фальсыфікацыі выбараў, але і найглябальнейшай разборкай паміж пасталелымі і апранутымі ў форму «быкамі» са спальных раёнаў і «нефармаламі» рознай ступені прасунутасьці.

Пра гэты сацыяльны канфлікт чытайце ў артыкуле «Гоп-стоп рэвалюцыі». Тэзаўрус знакавых рэчаў, паняцьцяў і VIPs чытайце ў «Слоўніку Рэйвалюцыі». На франты камунікатыўнай вайны вясны’2006 вяртае артыкул «Жглі як маглі. Ад трындзецкага інфармбюро». Пра ролю міжнароднай супольнасьці ў Рэйвалюшане нагадвае артыкул «Ту-ту-турысты, авантурысты. Харашо што прыехаў». Таксама ў кнізе чытайце і глядзіце ТОР-10 лепшых флэш-мобаў вясны «Весела была, як бацьку хавалі» і шмат чаго яшчэ. А на дэсэрт — поўны варыянт бэстсэлеру «Песьні свабоды». І ўсё гэта разбаўлена фота-, аўдыё-, відэа-дакумэнтамі.

«Open air RAVElution» можна БЯСПЛАТНА замовіць, запоўніўшы заяўку.

www.za-svabodu.org