У Варшаве да галадоўкі салідарнасьці з Аляксандрам Казуліным далучыўся яшчэ адзін чалавек, а ў цэнтры Брусэлю прайшоў пікет супраць падтрымкі Расеяй цяперашніх беларускіх уладаў.

Да былога паплечніка па прэзыдэнцкай кампаніі Аляксандра Казуліна Ігара Крыштона, які ўчора каля беларускага пасольства ў Варшаве пачаў галадоўку салідарнасьці з экс-кандыдатам, далучылася сябра АГП Натальля Завадзкая.

(Завадзкая: ) “Я пратэстую супраць парушэньня правоў Аляксандра Казуліна, які атрымаў пяць з паловай гадоў зьняволеньня толькі за тое, што пратэставаў супраць фальсыфікацыі вынікаў выбараў”.

Падтрымаць галадоўнікаў да будынку амбасады прыйшлі сёньня некалькі беларусаў зь бел-чырвона-белымі сьцягамі і транспарантамі з патрабаваньнем вызваліць Аляксандра Казуліна.

Аляксей Дзікавіцкі
Радыё Свабода