16 сьнежня 2005 года на цэнтральнай плошчы Салігорска ўпершыню стаялі людзі са сьвячамі ў рукох. З таго самага часу салігорсцы штомесяц прыходзяць на плошчу на знак салідарнасьці з сем'ямі зьніклых палітыкаў, з палітычназьняволеннымі.

Людзі трымаюць запаленыя сьвечы cалідарнасьці і партрэты вядомых палітыкаў, якія сталі ахвярамі рэжыму Лукашэнкі. Штомесяц гэтых людзей пільнуе міліцыя, здымае на відэа, запужвае і пэрыядычна затрымлівае, перасьледуюць на працы, ціснуць у школах і вучэльнях, караюць штрафамі. Аднак нягледзячы на гэта, колькасьць удзельнікаў у ланцугу неабыякавых людзей толькі павялічваецца.

Асабліва ўражвае, што пераважная колькасьць удзельнікаў гэта маладзёны, якім прыйдзецца будаваць будучыню нашае краіны. Таму, незважаючы на ціск уладаў, незважаючы на прапаганду ў мясцовых дзяржаўных СМІ, якія выліваюць тоны бруду на ўдзельнікаў акцыі, незважаючы на страх быць затрыманым, на цэнтральнай плошчы Салігорска роўна а восьмай гадзіне вечара, як і год таму, зноўку зьявіліся людзі, зноўку запалілі сьвечы, зноўку тулмачылася мінакам чые партрэты ў іх рукох зараз. Гэтае адчуваньне Салідарнасьці і узаемападтрымкі натхняе салігорцаў ня быць абыякавымі да лёсаў Зьмітра Дашкевіча і Паўла Севярынца, Артура Фінькевіча і Аляксандра Казуліна. Гэта мацней за ўсё спробы запужаць.

Таму і наступным месяцам 16-га на плошчы ізноў зьявіцца ланцуг з партрэтаў і сьвечак, і колькасьць яго яшчэ больш павялічыцца. І гэта будзе адбывацца ў кожным горадзе Беларрусі да таго часу, пакуль улады не вызваляць з-за кратаў усіх палітвязьняў і пакуль не пачнуць шукаць тых, хто вінаваты ў зьнікненьні вядомых беларускіх палітыкаў і грамадзкіх дзеячаў.

saligorsk.org