Некалькі дзесяткаў чалавек выйшлі сёння, у Дзень салідарнасці, на Кастрычніцкую плошчу Менска з партрэтамі палітвязняў. Як паведамляе карэспандэнт прэс-цэнтра Хартыі’97, людзі здолелі прастаяць на плошчы ўсяго некалькі хвілін. Як толькі ўдзельнікі акцыі дасталі партрэты палітвязняў, да іх падышлі супрацоўнікі АМАПа ў цывільным і запатрабавалі разысціся. Людзей выцеснілі з плошчы на праспект Незалежнасці ў бок ГУМа.

Дзесяткі людзей, якіх выцеснілі з Кастрычніцкай плошчы, прыйшлі да касцёла святога Язэпа на вуліцы Кірылы і Мяфодзія. Людзі трымаюць у руках партрэты палітвязняў і моляцца. Побач дзяжураць супрацоўнікі АМАПа.

Нагадаем, што вернікі ўжо два гады змагаюцца за вяртанне касцёла святога Язэпа Каталіцкай царкве. Раней у касцёле і манастыры размяшчалася ваенная камендатура, а цяпер улады збіраюцца перабудаваць манастыр у гасцініцу з басейнам і боўлінгам. Акцыі ў абарону касцёла праходзяць ля яго сцен штодня.

Хартыя’97