Беларусь выканала адну з умоваў ЭЗ і ЗША — вызваліла ўсіх палітвязьняў. У Менск прыбыў памочнік Дзяржсакратара ЗША Дэйвід Мэркель. Расея настойвае на падтрымцы яе дзеяньняў у Абхазіі і Паўднёвай Асэтыі. Радыё Свабода робiць агляд новай сытуацыi ў Беларусi.

ЭЗ вітае вызваленьне С.Парсюкевіча і А.Кіма

Вызваленьне ўсіх палітвязьняў камісар па зьнешніх сувязях і палітыцы добрасуседзтва Бэніта Фэрэра-Вальднэр назвала “знакам, які абнадзейвае”.

Дэвід Мэркель сустрэнецца зь лідэрамі апазыцыі

22 жніўня ў Дэвіда Мэркеля заплянаваная сустрэча са старшынём Партыі БНФ Лявонам Баршчэўскім, кіраўнікамі Партыі камуністаў Беларускай — Сяргеем Калякіным і АГП — Анатолем Лябедзькам, а таксама з былымі кандыдатамі на прэзыдэнта Аляксандрам Мілінкевічам і Аляксандрам Казуліным, паведаміў А.Лябедзька.

Прадстаўнік Дзярждэпу ЗША ляціць у Менск

“Вызваленьне гэтых грамадзянаў разам зь іншым дае нам надзею на будучыя пазытыўныя крокі, прапановы рэальных магчымасьцяў істотнага паляпшэньня ў стасунках паміж ЗША і Беларусьсю”, - гаворыцца ў заяве прэсавага сакратара Дзяржэпартамэнту ЗША Робэрта Вуда.

20 жніўня з-за кратаў на волю выйшлі апошнія палітвязьні — Сяргей Парсюкевіч і Андрэй Кім. Краіны ЭЗ і ЗША віталі іх вызваленьне.

Прадстаўнікі апазыцыі кажуць, што лібэралізацыя ўмоўная і што гэта робіцца дзеля таго, каб выгандляваць у Расеі танныя энэрганосьбіты. Яны таксама зьвяртаюць увагу на тое, што ўлады выканалі толькі адно з патрабаваньняў ЭЗ і ЗША.

21 лістапада 2006 году камісар Эўразьвязу па зьнешніх сувязях і палітыцы добрасуседзтва Бэніта Фэрэра-Вальднэр абвясьціла дакумэнт, які выкладае тыя перавагі, якія ЭЗ мог бы даць Беларусі, калі б краіна стана на шлях дэмакратызацыі і павагі правоў чалавека і вяршэнства закону. Дакумэнт заснаваны на прапановах Рады ЭЗ, Эўрапейскай Камісіі, а таксама амбасадараў краін ЭЗ у Беларусі і зьяўляецца новай стратэгіяй, якая ўтрымлівае асноўныя напрамкі супрацоўніцтва Эўразьвязу і Беларусі.

Што прапануе Эўразьвяз Беларусі паводле Новай стратэгіі?

1. спрасьціць візавы рэжым паміж краінамі ЭЗ і Беларусьсю;
2. пашырыць памежнае супрацоўніцтва, якое спрыяе большаму ўзаемадзеяньню ў эканамічным разьвіцьці, ахове навакольнага асяродзьдзя;
3. павялічыць фінансавую дапамогу;
4. аказаць дапамогу ў правядзеньні рэформаў;
5. палепшыць сыстэму аховы здароўя і адукацыі;
6. дапамагчы рэфармаваць прававую і судовую сыстэмы з мэтай забесьпячэньня роўных правоў для ўсіх;
7. палепшыць стан навакольнага асяродзьдзя: якасьць вады, перапрацоўку выкідаў,
8. падтрымаць праграмы ліквідацыі наступстваў Чарнобыльскай катастрофы.

Каб такое супрацоўніцтва ў межах палітыкі добрасуседзтва пачалося, улады Беларусі павінны выканаць шэраг патрабаваньняў:

1. паважаць права народу Беларусі выбіраць сваіх лідэраў дэмакратычным шляхам — іх права чуць усе меркаваньні і бачыць усіх кандыдатаў на выбары; права апазыцыйных кандыдатаў і груп падтрымкі праводзіць кампаніі без уціску, судовага перасьледу або турэмнага зьняволеньня; незалежнае назіраньне за выбарамі, у тым ліку з боку беларускіх няўрадавых арганізацыяў; права волевыяўленьня і права на справядлівы падлік галасоў;

2. паважаць права народу Беларусі на незалежную інфармацыю, і выказвацца вольна, напрыклад, дазваляючы журналістам працаваць без прыгнёту або судовага перасьледу, не зачыняючы газэт і не перашкаджаючы іх распаўсюджваньню;

3. паважаць правы недзяржаўных арганізацый, як жыцьцёва важнай часткі здаровай дэмакратыі — больш не ускладняць іх легальнае існаваньне, не прыгнятаючы і не перасьледваючы сябраў грамадзкіх арганізацый, і дазваляючы ім атрымоўваць міжнародную дапамогу;

4. вызваліць усіх палітычных зьняволеных — сябраў палітычных апазыцыйных партый, сябраў НДА і простых грамадзян, арыштаваных падчас мірных дэманстрацый і мітынгаў;

5. належным чынам і незалежна расьсьледаваць або перагледзець выпадкі са зьнікненьнем людзей;

6. забясьпечыць права беларусаў на незалежную і непрадузятую судовую сыстэм — з судзьдзямі, незалежнымі ад палітычнага ціску, без самаўпраўнасьці і галаслоўнага крымінальнага судовага перасьледваньня або палітычна-матываванага судовага прысуду, як зьняволеньне ў турму грамадзян, якія мірна выказваюць свой пункт погляду;

7. спыніць адвольныя арышты і затрыманьні, дрэннае абыходжаньне з людзьмі;

8. паважаць правы і свабоды тых беларускіх грамадзян, якія адносяцца да нацыянальных меншасьцяў;

9. паважаць правы беларусаў як працаўнікоў — іх права ўступаць у прафсаюзы і права прафсаюзаў працаваць на абарону праў людзей;

10. паважаць правы беларусаў як прадпрымальнікаў ажыцьцяўляць дзейнасьць без празьмернага ўмяшаньня улад;

11. далучыцца да адмены сьмяротнай кары ўсьлед за іншымі народамі Эўропы;

12. выкарыстаць падтрымку, якую АБСЭ, ЭС і іншыя арганізацыі прапаноўваюць Беларусі для дапамогі ў выконваньні правоў сваіх грамадзян.

Радыё Свабода