Зварот дапоўнены інфармацыйнай запіскай, у якой апісаныя факты выкрадання апанентаў беларускай улады.
16 верасня на імя Прэзідэнта Еўрапейскага парламента Ежы Бузека і лідэраў вядучых фракцый парламента адасланы зварот з прапановай правесці слуханні аб выкраданні і забойстве палітычных апанентаў беларускага рэжыму, паведамляе сайт ucpb.org.
Анатоль Лябедзька паведаміў, што «пад зваротам паставілі подпісы вядомыя грамадзяне Беларусі, грамадскія і культурныя дзеячы, палітыкі.
У прыватнасці, Генадзь Бураўкін, Сяргей Законнікаў, Анатоль Вярцінскі, Андрэй Саннікаў, Уладзімір Колас, Яраслаў Раманчук, Сяргей Калякін, Вінцук Вячорка, Уладзімір Някляеў, Рыгор Кастусёў і іншыя. Усяго больш за 30 чалавек».
Паводле інфармацыі лідэра АГП зварот дапоўнены інфармацыйнай запіскай, у якой апісаныя факты выкрадання апанентаў беларускай улады.
«Наша мэта не толькі актуалізаваць тэму выкраданняў і забойстваў вядомых у Беларусі людзей, — кажа Лябедзька, — але і стварыць абарону для тых, хто мае намер кінуць выклік Лукашэнку на хуткіх прэзідэнцкіх выбарах».
Русский
English